Vigosónico Showcase

Introdución

Vigosónico Showcase é unha liña audiovisual impulsada desde Vigosónico, espazo público dependente da Concellería de Xuventude do Concello de Vigo, co obxectivo de dar visibilidade ao talento musical emerxente da cidade a través da gravación de sesións en directo en formato audiovisual.

A iniciativa nace como unha ferramenta de apoio, promoción e documentación da escena musical viguesa, ofrecendo ás bandas e artistas seleccionadas a posibilidade de gravar unha sesión de 3 ou 4 temas nas instalacións de Vigosónico, nun formato coidado tanto a nivel sonoro como visual.

Vigosónico Showcase non se concibe como un concurso competitivo, senón como unha programación audiovisual comisariada, aberta á participación de bandas e artistas mediante convocatoria pública. A selección realizarase atendendo a criterios de calidade artística, viabilidade técnica, vinculación co municipio de Vigo, diversidade estilística, paridade, inclusión, idade das persoas participantes, potencial de desenvolvemento e equilibrio global da programación.

Ao tratarse dun espazo público municipal financiado con recursos públicos do Concello de Vigo, esta convocatoria ten como finalidade prioritaria favorecer a participación de proxectos musicais vinculados á cidade e, especialmente, de persoas novas, contribuíndo á profesionalización, difusión e fortalecemento da comunidade musical viguesa.

Obxecto da convocatoria

A presente convocatoria ten por obxecto seleccionar ata 10 bandas ou artistas para participar en Vigosónico Showcase 2026, unha serie de sesións audiovisuais gravadas en Vigosónico.

Cada sesión consistirá na gravación en directo de 3 ou 4 temas, nunha única xornada, co obxectivo de xerar unha peza audiovisual de calidade que poida servir como carta de presentación artística, material promocional e documento da escena musical local.

Persoas e proxectos destinatarios

Poderán presentarse á convocatoria bandas, solistas ou proxectos musicais emerxentes vinculados ao municipio de Vigo.

No caso de proxectos individuais, a persoa solicitante deberá estar empadroada en Vigo ou acreditar unha vinculación musical estable coa cidade.

No caso de bandas ou proxectos colectivos, polo menos a maioría simple dos seus integrantes —é dicir, máis da metade dos membros do grupo— deberá estar empadroada en Vigo.

De maneira excepcional, poderán valorarse proxectos nos que non todos os integrantes cumpran esta condición, sempre que exista unha vinculación clara, estable e acreditable coa escena musical viguesa, con Vigosónico ou co desenvolvemento da súa actividade artística na cidade.

Dado que Vigosónico é un servizo público orientado preferentemente á mocidade, terán prioridade os proxectos integrados por persoas novas, especialmente aqueles nos que a maioría dos seus membros teñan 35 anos ou menos. A participación de persoas maiores de 35 anos non quedará excluída de maneira automática, pero poderá ter menor prioridade cando existan proxectos xuvenís que cumpran igualmente os criterios artísticos, técnicos e de vinculación co municipio.

Requisitos das propostas

Repertorio propio

As sesións de Vigosónico Showcase gravaranse exclusivamente con temas de autoría propia das persoas participantes. Un showcase ten por finalidade presentar a voz e a identidade artística do propio proxecto; ademais, dado que a peza resultante se difunde publicamente e o seu máster queda en mans dos seus autores, debe estar composta por obras sobre as que as persoas participantes ostenten a autoría. Por este motivo, non se admitirán versións nin adaptacións de obras de terceiros nas sesións gravadas.

Número de temas

Cada sesión incluirá 3 ou 4 temas, segundo se acorde coa organización en función da viabilidade técnica e da duración da xornada.

Estilo e idioma

A convocatoria está aberta a calquera estilo musical e idioma, en coherencia co criterio de diversidade estilística da programación.

Dispoñibilidade

As persoas seleccionadas deberán comprometerse a estar dispoñibles para a xornada de gravación que se lles asigne dentro do calendario xeral, así como para a coordinación técnica previa coa organización.

Formato da sesión

Cada banda ou artista seleccionado realizará unha sesión audiovisual en Vigosónico coas seguintes características:

• Gravación de 3 ou 4 temas de autoría propia.
• Realización nunha única sesión de traballo.
• Gravación en directo ou en formato adaptado ás condicións técnicas do espazo.
• Rexistro sonoro e audiovisual segundo a planificación da organización.
• Coordinación previa co equipo técnico de Vigosónico.

A duración, horario e necesidades técnicas de cada sesión serán acordadas coa organización, atendendo á dispoñibilidade do espazo, ao calendario xeral e á viabilidade da proposta.

Presentación de solicitudes

As solicitudes presentaranse a través do formulario electrónico dispoñible en www.vigosonico.com.

Cada proxecto poderá presentar unha única solicitude, que deberá incluír a seguinte información e documentación:

• Nome do proxecto ou banda, estilo musical e número de integrantes.
• Breve presentación ou dossier do proxecto: traxectoria e descrición artística.
• Enlaces a material existente: gravacións, vídeos, redes sociais ou plataformas de escoita.
• Indicación do repertorio propio previsto para a sesión: 3 ou 4 temas.
• Acreditación da vinculación con Vigo: empadroamento da maioría dos integrantes ou, no seu caso, xustificación da vinculación estable coa escena musical viguesa.
• Datos de contacto da persoa responsable do proxecto.

No caso de proxectos con integrantes menores de idade, a persoa responsable deberá indicalo na solicitude. A correspondente autorización dos seus representantes legais formalizarase, de ser seleccionado o proxecto, con anterioridade á gravación.

Calendario

O calendario previsto para a primeira edición é o seguinte:

• Apertura do prazo de solicitudes: 8 de setembro de 2026.
• Peche do prazo de solicitudes: 28 de setembro de 2026.
• Comunicación dos proxectos seleccionados: primeira quincena de outubro de 2026.
• Período de gravacións: de outubro de 2026 a marzo de 2027, agás decembro, a razón de aproximadamente dúas sesións ao mes.

A planificación concreta de cada gravación acordarase individualmente con cada proxecto seleccionado.

Criterios e proceso de selección

A selección realizarase conforme aos seguintes criterios:

A selección non se realizará unicamente por orde de puntuación, senón atendendo ao conxunto dos criterios establecidos e ao equilibrio global da programación, ao tratarse dunha liña audiovisual comisariada.

A organización poderá establecer unha listaxe de reserva para cubrir posibles renuncias, incompatibilidades de calendario ou imposibilidades técnicas dos proxectos inicialmente seleccionados.

Dereitos sobre as gravacións e condicións económicas

Titularidade

A titularidade das gravacións, máster, corresponderá ás persoas autoras e intérpretes de cada proxecto. Vigosónico Showcase non se apropia das obras das persoas participantes.

Autorización de uso

As persoas seleccionadas outorgarán a Vigosónico, ao Concello de Vigo e, se procede, á entidade produtora e coordinadora da actividade, unha autorización non exclusiva, gratuíta, de ámbito mundial e de duración indefinida para o uso e a comunicación pública da gravación audiovisual. Esta autorización ten por finalidade a difusión cultural, institucional, promocional e documental do proxecto e da propia actividade, e non a explotación comercial da gravación.

Uso por parte do proxecto

As persoas participantes poderán empregar libremente a peza con fins promocionais non comerciais, respectando en todo momento a integridade da gravación e a presenza dos logotipos de Vigosónico e do Concello de Vigo. Non poderán vender, licenciar a terceiros nin explotar comercialmente a gravación sen autorización previa, pero si poderán empregala para a súa promoción.

Garantía de dereitos

As persoas participantes garanten ser titulares dos dereitos sobre as obras interpretadas e responsabilízanse fronte a calquera reclamación de terceiros respecto delas.

Formalización

Esta cesión formalizarase mediante un documento de cesión de dereitos asinado por todos os integrantes do proxecto con anterioridade á gravación. No caso de integrantes menores de idade, o documento será asinado polos seus representantes legais.

Condicións económicas

A participación é totalmente gratuíta e non xera ningunha contraprestación económica para as persoas participantes. O Concello de Vigo, a través de Vigosónico, asume os custos de produción da sesión. A organización renuncia a obter ingresos pola explotación das gravacións.

Créditos

Garantirase en todo momento a correcta atribución da autoría do proxecto e das obras, en respecto dos dereitos morais das persoas autoras e intérpretes.

Protección de datos persoais

En cumprimento do Regulamento UE 2016/679, RGPD, e da Lei Orgánica 3/2018 de protección de datos persoais e garantía dos dereitos dixitais, infórmase do tratamento dos datos persoais facilitados nas solicitudes nos seguintes termos:

• Responsable do tratamento: o Concello de Vigo, a través de Vigosónico, Concellería de Xuventude.
• Finalidade: a xestión da convocatoria, a selección dos proxectos e a coordinación, comunicación e difusión da actividade.
• Lexitimación: o consentimento da persoa interesada, manifestado coa presentación da solicitude, así como o exercicio das competencias municipais en materia de xuventude e cultura.
• Destinatarios e conservación: non se cederán datos a terceiros, agás obriga legal. Os datos conservaranse durante o tempo necesario para os fins indicados e para o cumprimento das obrigas legais aplicables.
• Dereitos e canle de exercicio: as persoas interesadas poderán exercer os dereitos de acceso, rectificación, supresión, oposición, limitación e portabilidade, así como retirar o consentimento outorgado, dirixíndose ao Concello de Vigo a través dos seus rexistros ou á súa Delegación de Protección de Datos.

Aceptación das bases

A participación na convocatoria implica a aceptación íntegra destas bases. A organización resérvase a facultade de interpretalas, de resolver calquera cuestión non prevista nelas e de introducir, por causas xustificadas, as modificacións que resulten necesarias, dándolles a debida publicidade. Así mesmo, a organización poderá declarar deserta total ou parcialmente a selección se as propostas presentadas non acadan os criterios de calidade e adecuación previstos.